John 11

Lasarus i Met

1Nenge kaltu tina Beteni, asa e Lasarus i sasem, ma i e fenelik e Maria ru la kisilik e Mata. Ma Maria ae, i sau in fore sanda na iun keke Kumguui ma ik salis fasengseng u ini olo. 3Pesu, ru la kisilik ru ka ta orek isi Iesu le, “Kumguui, ier ae o ier kanaka isi, i sasem.”

4Isau le aunbiing Iesu ka ongen u, ke ka tara aragii, “Sasem igii, biil in farfarop ini minet, biil. Sasem igii una finngas memeh ke God, isi Kalalik ke God ik kep memeh lo.” 5Iesu i ier kanaka isi Mata ru la kisilik e Maria tura fenelik ru sing Lasarus. 6Iesu ka ongen ta u le Lasarus i sasem, isau le ka kiis pes iwu biitom e biing aiwa na maleh ae.

7Namih ka fas foron berbetat na fafausum kia le, “Kerek fis sabin una Iudaia.”

8Ri ka tara sing i, “Ah! Tom fafausum, pakanini sau foron famfamu ken fan Iudaia ri totof tah isi luumete wo. Isau le igii, o ka ier sabin isi ok fis unaiwa?”

9Iesu ka kiliis ri aragii, “I sangful ini wu e kiptin aunbiing na nenge biing. Kaltu i la na kiptin ien, biil in tipeh. Biil. Wara le i par na malal tina piklinbat. 10Isau le, aunbiing i la na wor, ke in tipeh, wara le biil i mel e malal kia.”

11Namih Iesu ka use ta u arae, ka fas ri mang le, “Talrer sing Lasarus ka masun tah. Isau le ian la isi iak famat u.”

12Foron berberat na fafausum kia ri ka kiliis u aragii, “Kumguui, male i masun, ke sasem kia in rop koseng u ma in liu rokap.” 13Kamtinan orek ke Iesu le, Lasarus ka met tah, isau le berberat na fafausum kia ri ka wol le Lasarus i masun sau.

14Pesu, Iesu ka fas fatus ri mang le, “Lasarus ka met tah. 15Ma ia wol lo gam, pesu ia ka laes le ia biil tinaiwa na aisa, isi gamek unune. Isau le, kerek la mang usuf i.”

16Ke Tomas (nenge asa e Didimas, kamtina le Kasang) ka fas tikii berberat na fafausum le, “Kerek la nami sabin, isi kerek met tura.”

Iesu i Famor iun la Kisilik

17Ke aunbiing Iesu ka tapiek aiwa, ka tafe u le, ka fet tah e biing lo Lasarus awii na matanfat una luun minet. 18Beteni i fatat isi Ierusalem, i fasih arae ituul sau e kilomita, 19pesu ifuun e fan Iudaia ri la tah unaisa Mata ru e Maria isi famor ruh namin minet ke fenelik ruh. 20Aunbiing Mata ka ongen u le Iesu apiek, ka suuh isi tafe u, isau le Maria tinaiwa tom na fel.

21Mata ka fas Iesu aragii, “Kumguui, le wo ta tom aga, ke feneklik biil tom in met. 22Isau le igii, ia usum le sanih o sising u sing God, God in ta u.”

23Iesu ka fas u aragii, “Fenemlik in aptih fis sabin.”

24Mata ka kiliis u aragii, “Ia usum le in aptih fis sabin na aunbiing na apaptih fis na farfarop na biing.”

25Iesu ka fas u aragii, “Iau tom e apaptih fis ke iau tom e liu, seh i unune lo iau, taftawa male in met, in liu sabin, 26ma fanseh ri liu ma ri unune lo iau, biil in to met. O unune na sanih ia use u igii?”

27Mata ka fas u aragii, “Tekentu kanaka, Kumguui, ia unune le wo Mesaia, ma wo e Kalalik ke God, ae keme usum le in la uga na piklinbat.”

28Aunbiing Mata ka use ta u aragii, ka fis sabin ma ka kam fakum pes kisilik sing Maria, ke ka fas u le, “Tom fafausum igii, ma i diik isi wo.” 29Aunbiing Maria ka ongen ta u arae, ka sangar suuh isi tafe u. 30Iesu biil biitom i tapiek na maleh kiruh, isau le, i tinaiwa biitom na falifuh ae Mata i tafe ta u lo. 31Fan Iudaia ae ri batme ta Maria awii na fel, ri ka par u i sangsangar na aptih ma ka suuh, ke ri ka mi lo, wara le, ri wol le ka la una matanfat una luun minet isi teng. 32Ke aunbiing Maria ka tapiek na falifuh ae Iesu tinaiwa lo, ka par u ma ka luut uf na famu lo Iesu ma ka tarah, “Kumguui, male wo ta tom aga, ke feneklik biil tom in met.”

33Aunbiing Iesu ka par Maria i teng ke fan Iudaia ae ri la tura, ri ka teng sabin, ka purngis e bala ma ka ier isi teng. 34Iesu ka diik ri le, “Fia gam ka faborong u wah?”

Ri ka kiliis u aragii, “Kumguui, la ke ok par u.”

35Ma Iesu ka teng. 36Ke fan Iudaia ri ka tara, “Gam par u, i mais kanaka u tom.”

37Isau le fal lo ri, ri ka tara le, “I sapeng tah na matan nenge kut. Isi sah biil ik lupes ta kaltu igii isi gong i met?”

Iesu i Faliu pes Lasarus tina Minet

38Ka purngis sabin e bala Iesu, ke ka la una matanfat una luun minet. Matan fat ae, i e nenge matanfat ri babat kale u ini nenge tara na fat. 39Iesu ka fas ri aragii, “Tel ufu fat ae.”

Mata, fenelik e kaltu ae i met, ka tara, “Kumguui, ka fet tah e biing kale u ma igii ik mapuh tah.”

40Ke Iesu ka tara sing i aragii, “Ia ka fas ta wo tah, male on unune, ke on par memeh ke God.”

41Ke ri ka tel ufu fat. Ke Iesu ka par una mawe ma ka tarah, “Tata, ia fot rokap lo wo wara le o ka ongen ta iau. 42Ia ka usum tah le o wong fitliu sing iau. Isau le ia use u aragii, una rokap ken fanu igii ri sotih turang, isi rik unune le o wuun ta iau.”

43Aunbiing Iesu ka use ta u aragii, ka perek aragii, “Lasarus, suuh ugapiek!” 44Ma kaltu ae i met tah ka suuh, iun lima ke iun keke ri afit ta u ini kaen una afit minet, ke nenge kaen sabin ri fis ta u kale paklu. Ke Iesu ka fas ri aragii, “Gam puk ufu foron kaen ae lo, isi ik la.”

Ri Put orek isi Siimete Iesu

(Mt 26:1�5; Mk 14:1�2; Lk 22:1�2)

45Pesu, ifuun e fan Iudaia ae ri la tah isi par Maria ri ka par sanih ae Iesu i fatapiek ta u, ma ri ka unune lo Iesu. 46Isau le fal lo ri, ri ka la usuf foron Farasi ma ri ka fas ri ini sanih Iesu i tel ta u. 47Ke foron famfamu ken foron pris ke foron Farasi, ri ka kam turim foron laulaumet ken fan Iudaia, ma ri ka diik ri aragii,

“Sanih keren tel u? Kaltu igii ka famam tel ifuun mang e rakrakai na fakileng. 48Male keren wol fofoes lon kaltu igii, ke fanu tikii rin unune lo, ke fan Rom rin la ma rik falaulau Felun Sising turan fanu tikii kirer.”

49Isau le, neng lo ri, asa e Kaiapas, i laulaumet na pris lo e bet ae, ka fas ri aragii, “Biil gam usum na ti tier! 50Biil gam par failiim u le, i e rokap kimi le in tikii e kaltu in kep salan fanu tikii, isi fanu tikii gong ri met.”

51Biil i use u aragii ini wolwol kia tom. Biil. Isau le i laulaumet ken foron pris na bet ae, pesu ka orek poropet le Iesu in met isi fan Iudaia, 52ma biil isi fan Iudaia sau. Biil. Isau le i met sabin isi berberat ke God ae ri kiis sararah, isi ik tel turim ri, isi ik tikii lo ri. 53Ke tipesu na biing ae, foron famfamu ken fan Iudaia ri ka im sal una siimete u. 54Pesu, Iesu biil mang i la malal la na fatpoton fan Iudaia. Isau le ka kang tinaiwa una nenge falifuh fatat isi maraslaii una nenge maleh asa e Efraim, ma ka melmel aiwa turan berberat na fafausum kia.

55Aunbiing ka fatat isi tel inen na Liuliu Kulef ken fan Iudaia. Ke fanu fuun ri ka tatkau una Ierusalem tina foron maleh kiri, famu na inen na Liuliu Kulef isi matngan susuh una fakalkaluu ri na mata God. 56Ke ri ka parpar isi Iesu aiwa, ma aunbiing ri sotih awii na baban Felun Sising, ri ka famam na fadiik faliu ini ri tom aragii, “Arafah gam wol arae? Biil mang ngan in la uga na tel inen, beh?” 57Ri ka diik arae, wara le foron famfamu ken foron pris ke foron Farasi ri ka luun ta rakrakai na orek le, male tikas i usum na falifuh ae Iesu i kiis wah, ke ik use u isi rik luse u.